កូរ៉េខាងត្បូង៖ រាល់ការជ្រើសរើស និងបញ្ជូនពលករ និងកម្មសិក្សាការីខ្មែរទៅធ្វើការនៅបរទេស ដោយគ្មានការ អនុញ្ញាតពីក្រសួងការងារ និងបណ្ដុះបណ្ដាលវិជ្ជាជីវៈ គឺជាអំពើជួញដូរមនុស្ស នេះបើតាមការបញ្ជាក់ក្នុងទំព័រហ្វេសប៊ុករបស់លោកអនុព័ន្ធការងារនៃស្ថានទូតកម្ពុជា ប្រចាំសាធារណរដ្ឋកូរ៉េ ដែលចែករំលែកនៅល្ងាចថ្ងៃព្រហស្បត្តិ៍នេះ។
តាមរយៈការចែករំលែករបស់លោកអនុព័ន្ធការងារនៃស្ថានទូតកម្ពុជា បានបញ្ជាក់ថាយោងអនុក្រឹត្យលេខ១៩០ ចុះថ្ងៃទី ១៧ ខែសីហា ឆ្នាំ២០១១ ស្ដីពីការគ្រប់គ្រងពលករលើការបញ្ជូនពលករខ្មែរទៅធ្វើការនៅបរទេសតាមរយៈទីភ្នាក់ងារជ្រើសរើសឯកជន បានកំណត់ថា រាល់ទីភ្នាក់ងារជ្រើសរើសពលករខ្មែរ ទៅធ្វើការនៅបរទេស ត្រូវទទួលការអនុញ្ញាតពីក្រសួងការងារ និងបណ្ដុះបណ្ដាលវិជ្ជាជីវៈជាមុន ក្នុងការជ្រើសរើស បណ្ដុះបណ្ដាល និងបញ្ជូនពលករ និងកម្មសិក្សាការីខ្មែរ ទៅធ្វើការនៅបរទេស។
ដូចនេះ រាល់ការជ្រើសរើស និងបញ្ជូនពលករ និងកម្មសិក្សាការីខ្មែរទៅធ្វើការនៅបរទេស ដោយគ្មានការ អនុញ្ញាតពីក្រសួងការងារ និងបណ្ដុះបណ្ដាលវិជ្ជាជីវៈ គឺជាអំពើជួញដូរមនុស្ស។
កន្លងមក ក្រសួងការងារបានចាត់វិធានការតាមផ្លូវច្បាប់ពីសកម្មភាពរបស់សាលា និងអង្គការមួយចំនួន ធ្វើសកម្មភាពបញ្ចុះបញ្ចូលអូសទាញ ឱ្យប្រជាពលរដ្ឋធ្វើការចុះឈ្មោះ និងបង់ប្រាក់ ដើម្បីជាថ្នូរទៅនឹងការទទួលបានសិទ្ធទៅធ្វើការនៅសាធារណរដ្ឋកូរ៉េ ដោយមិនចាំបាច់ប្រឡង។
ក្នុងនោះដែរ លោកអនុព័ន្ធការងារក៏បានបញ្ជាក់ថា កាលពីថ្ងៃទី ០២ ខែ ឧសភា ឆ្នាំ ២០១៨ ក្រុមមេធាវី តំណាងដោយអាណត្តិឱ្យក្រសួងការងារ បានដាក់ពាក្យបណ្ដឹងទៅកាន់ព្រះរាជអាជ្ញាអមសាលាដំបូងខេត្តកំពង់ឆ្នាំង ដើម្បីបន្តនីតិវិធីទៅលើក្រុមខាងលើ ដែលប្រព្រឹត្តផ្ទុយនឹងច្បាប់ ហើយក្រុមខាងលើ ក៏ត្រូវបានតុលាការ ចោទប្រកាន់តាមមាត្រា ៦០៩ និង៦១០ នៃក្រមព្រហ្មទណ្ឌ ហើយបានចាត់ទុកថាជាការកេងចំណេញទាំងស្រុងលើកម្លាំងពលកម្ម ក៏ដូចជាផលប្រយោជន៍ពលករ។
បើតាមសារព័ត៌មានភ្នំពេញបុស្តិ៍ ការបញ្ជូនពលករកម្ពុជាទៅបម្រើការងារនៅសាធារណរដ្ឋកូរ៉េ ក្រោមប្រព័ន្ធ EPS ត្រូវបានចុះអនុស្សរណៈនៃការយោគយល់គ្នារវាងលោកនាយករដ្ឋមន្ត្រី ហ៊ុន សែន និង លោក Roh Moo-Hyun អតីតប្រធានាធិបតីនៃសាធាណរដ្ឋកូរ៉េ កាលពីខែវិច្ឆិកា ឆ្នាំ ២០០៦ ដែលមានគណៈកម្មាធិការបណ្តុះបណ្តាល និងបញ្ជូនពលករទៅបរទេសនៃក្រសួងការងារ និងបណ្តុះបណ្តាលវិជ្ជាជីវៈកម្ពុជា និងអង្គភាពអភិវឌ្ឍន៍ធនធានមនុស្សនៃក្រសួងការងារ និងមុខរបរនៃសាធារណរដ្ឋកូរ៉េជាប្រតិបត្តិករ។
គិតចាប់ពីឆ្នាំ ២០០៧ មកកម្ពុជាបានបញ្ជូនពលករសរុបចំនួន ៦៨ ២៩៤ នាក់ (ស្រីជិត ១ ម៉ឺន ៥ ពាន់នាក់) ឲ្យទៅបម្រើការក្នុងវិស័យឧស្សាហកម្ម កសិកម្ម និងសំណង់ដែលអាណត្តិការងារមានរយៈពេល ៤ ឆ្នាំ ១០ ខែ បើតាមការបញ្ជាក់របស់សារព័ត៌មានភ្នំពេញបុស្តិ៍។
