គីមផូ៖ ផលដំណាំ រួមនិងការបណ្តុះពូជកូនបន្លែខ្មែរ ដែលបានកើតចេញពីគម្រោងបន្លែសហគមន៍របស់ស្រ្តីខ្មែរនៅកូរ៉េ ពេលនេះបានលេចចេញជារូបរាង និងផ្លែផ្កាជាបណ្តើរៗហើយ បើតាមការលើកឡើងរបស់លោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ។
តាមរយៈការលើកឡើងរបស់ប្រមុខទូតកម្ពុជារូបនេះ ផលដំណាំនៃគម្រោងខាងលើកំពុងចេញផល ហើយស្របពេលគ្នានេះដែរ ក្រុមការងារក៏បានរៀបចំបន្តថែទាំ និងដាំបន្ថែមនូវផលដំណាំផ្សេងទៀតផងដែរ។
គម្រោងបន្លែសហគមន៍នេះ ជាគំនិតផ្តួចផ្តើម និងទទួលបានការឧបត្ថម្ភទាំងស្រុងរបស់ស្ថានទូតកម្ពុជានៅប្រទេសកូរ៉េ ហើយបានចាប់ផ្តើមអនុវត្តបាន ២ សហគមន៍រួចមកហើយ នៅតំបន់អានសាន និងគីមផូ។ កម្មវិធីនេះមានគោលបំណងដើម្បីឧបត្ថមគាំទ្រដល់ស្រ្តីខ្មែរដែលមានក្រុមគ្រួសារកូរ៉េ មានជីវភាពខ្វះខាត ឬអត់ការងារធ្វើ ឬចង់ស្វែងយល់ពីការដាំបន្លែដែលមានតម្រូវការ ជាមួយនឹងតម្លៃខ្ពស់នៅប្រទេសកូរ៉េ។
