កូរ៉េខាងត្បូង៖ ក្រុមហ៊ុនភេសជ្ជៈ Oriental Brewery (OB) Co., បានប្រកាសនឹងតម្លើងថ្លៃលើផលិតផលរបស់ខ្លួនមួយចំនួន ដែលក្នុងនោះមានទាំងស្រាបៀរ Cass ផងនោះ ចាប់ពីខែក្រោយនេះទៅ ដោយសារតែការតម្លើងពន្ធលើស្រាបៀរ បើតាមការបញ្ជាក់របស់ក្រុមហ៊ុននៅថ្ងៃចន្ទនេះ ចុះផ្សាយក្នុងសារព័ត៌មាន Yonhap News។
តាមរយៈការប្រកាសរបស់ក្រុមហ៊ុន ផលិតផលស្រាបៀរសំខាន់ៗមួយចំនួនរបស់ក្រុមហ៊ុននេះ រួមមានទាំងស្រាបៀរ Cass Fresh និងស្រាបៀរ Cass Light នឹងត្រូវតម្លើងថ្លៃជាមធ្យម ១.៣៦% ចាប់អនុវត្តពីថ្ងៃទី១ ខែមេសាខាងមុខទៅហើយ ដែលក្រោមគោលការណ៍តម្លើងថ្លៃថ្មីនេះ នឹងធ្វើឱ្យថ្លៃស្រាបៀរ Cass Fresh ចេញពីរោងចក្រផ្ទាល់កើនតម្លៃចំនួន ៨៤៥.៩៧វ៉ុន ទៅ៨៥៧.៩០វ៉ុន (ប្រមាណ ៧៥សេនដុល្លារ)។
សូមបញ្ជាក់ថា ក្រុមហ៊ុន Oriental Brewery (OB) Co., គ្រប់គ្រងទីផ្សារស្រាបៀរក្នុងស្រុកដល់ទៅ ៦០% ហើយជាក្រុមហ៊ុនសហការជាមួយក្រុមហ៊ុនស្រាបៀរ Anheuser-Busch InBev ដ៏ល្បីល្បាញរបស់ប្រទេសប៊ែលហ្សិក។
