កូរ៉េខាងត្បូង៖ វ៉ាក់សាំងកូវីដ Pfizer របស់អាម៉េរិកសម្រាប់មនុស្ស ៥០ម៉ឺននាក់បន្ថែមទៀតនឹងត្រូវដឹកមកដល់ប្រទេសកូរ៉េខាងត្បូងនៅចុងខែមីនានេះហើយ ជាវ៉ាក់សាំង Pfizer ជើងទីពីរដែលដឹកមកដល់កូរ៉េខាងត្បូង នេះបើតាមការបញ្ជាក់របស់អជ្ញាធរសុខាភិបាលកូរ៉េនៅថ្ងៃពុធនេះ ចុះផ្សាយក្នុងសារព័ត៌មាន Yonhap News។
តាមការបញ្ជាក់របស់មជ្ឈមណ្ឌលប្រយុទ្ធប្រឆាំងជំងឺឆ្លងកូរ៉េនេះ វា៉ក់សាំង Pfizer សម្រាប់មនុស្ស ២៥ម៉ឺននាក់ដំបូងនឹងត្រូវដឹកមកដល់កូរ៉េខាងត្បូងនៅថ្ងៃទី ២៤ ខែមីនា សប្តាហ៍ក្រោយ ខណៈវា៉ក់សាំង Pfizer សម្រាប់មនុស្ស ២៥ម៉ឺននាក់ទៀត នឹងត្រូវដឹកមកដល់ក្នុងសប្តាហ៍ចុងក្រោយនៃខែមីនានេះដែរ។
សម្រាប់បច្ចុប្បន្ន អជ្ញាធរកូរ៉េខាងត្បូងរៀបចំវ៉ាក់សាំង Pfizer នេះសម្រាប់ក្រុមមនុស្សវ័យចំណាស់ពី ៧៥ឆ្នាំឡើងទៅ និងក្រុមមនុស្សងាយរងគ្រោះដទៃទៀត ហើយវ៉ាក់សាំងនេះគ្រោងនឹងចាប់ផ្តើមចាក់ជូនជនអាទិភាពចាប់ពីដើមខែមេសាខាងមុខ រួមជាមួយនឹងវ៉ាក់សាំង AstraZeneca ដែលនឹងដឹកមកដល់ឆាប់ៗខាងមុខនេះផងដែរ។
តាមការបញ្ជាក់របស់អជ្ញាធរ វ៉ាក់សាំង Pfizer នឹងត្រូវដាក់ជូនទីតាំងផ្តល់វ៉ាក់សាំងចំនួន ២២ ទីតាំងទូទាំងប្រទេស ដោយសារតែស្ថានភាពតម្រូវឱ្យមានការទុកដាក់ពិសេសក្នុងសីតុណ្ហភាពត្រជាក់ខ្លាំងរហូតដល់ ៧០ អង្សារក្រោមសូន្យឯណោះ ហើយបើតាមការបញ្ជាក់របស់អជ្ញាធរ គ្រោងនឹងបង្កើតទីតាំងដែលមានសមត្ថភាពរក្សាទុកវ៉ាក់សាំង និងផ្តល់វ៉ាក់សាំង Pfizer នេះឱ្យបានដល់ ២៥៤ ទីតាំងទូទាំងប្រទេសនៅតាមមន្ទីរពេទ្យ ទីតាំងហាត់ប្រាណ ឬទីតាំងកំណត់ដទៃទៀតឱ្យបានត្រឹមខែកក្កដាខាងមុខផងដែរ។
សូមបញ្ជាក់ថា គិតត្រឹមថ្ងៃពុធទី ១៧ ខែមីនានេះ ចំនួនអ្នកទទួលវ៉ាក់សាំងកូវីដក្នុងប្រទេសកូរ៉េមានដល ៦២១,៧៣៤នាក់ហើយ ដែលក្នុងនោះអ្នកទទួលវ៉ាក់សាំង AstraZeneca មាន ៥៨៧,៩៩៦នាក់ និងអ្នកទទួលវ៉ាក់សាំង Pfizer មាន ៣៣,៧៣៨ នាក់ ហើយតាមការរាយការណ៍កន្លងមក អ្នកដែលមានប្រតិកម្មក្រោយទទួលវ៉ាក់សាំងមានដល់ ៩,០០៣ ករណីដែលត្រូវបានរាយការណ៍ ដែលក្នុងនោះ ៨,៨៩៨ ជាករណីប្រតិកម្មស្រាលធម្មតាប៉ុណ្ណោះ។
