កូរ៉េខាងត្បូង៖ ករណីពលករខ្មែរយើងម្នាក់ដែលមានបញ្ហាសតិអារម្មណ៍ ហើយត្រូវបានក្រុមការងារស្ថានទូតកម្ពុជាធ្វើការទំនាក់ទំនងទៅថៅកែ និងអ្នកពាក់ព័ន្ធដើម្បីជួយសម្រួល និងដោះស្រាយជូននោះ ពេលនេះស្ថានភាពគាត់មានភាពប្រសើរឡើងវិញខ្លះហើយ ហើយកំពុងត្រូវបានមិត្តភក្តិរបស់គាត់ជួយមើលថែទាំផ្ទាល់ដោយប្រុងប្រយ័ត្នជាទីបំផុត បើតាមការចែករំលែករបស់ទំព័រហ្វេសប៊ុក មាន ជីវិត មានសង្ឃឹម។
តាមការចែករំលែក ពួកគាត់ដែលជាមិត្តភក្តិបាននៅបន្តមើលថែពលករខ្មែរយើងដែលមានបញ្ហាសតិអារម្មណ៍នោះ ជាប់រហូតដោយមិនហ៊ានឱ្យគាត់នៅម្នាក់ឯងទេ សូម្បីតែដេកក៏ដេកយាមទ្វាររហូតដែលខ្លាចគាត់ដើរចេញទៅក្រៅ។ តាមការបញ្ជាក់ គាត់បានចងចាំឡើងវិញខ្លះហើយ គាត់ទារទៅផ្ទះរបស់គាត់ ហើយចង់និយាយទូរស័ព្ទជាមួយម្ដាយគាត់ផងដែរ។
សូមបញ្ជាក់ថា ម្សិលមិញនេះក្រោយពីមានការចែករំលែកជាបន្តបន្ទាប់ពាក់ព័ន្ធនឹងបញ្ហារបស់ពលករខ្មែរយើងខាងលើនេះ ដែលមានបញ្ហាសតិអារម្មណ៍ផង និងបានបាត់ឯកសារអត្តសញ្ញាណសំខាន់ៗផ្ទាល់ខ្លួនផងនោះ គាត់ត្រូវបានក្រុមការងារស្ថានទូត ជាពិសេសអនុព័ន្ធទទួលបន្ទុកការងារនៃស្ថានទូតសម្របសម្រួលទាក់ទងទៅថៅកែ និងមិត្តភក្តិ ដើម្បីបញ្ជូនគាត់ទៅមន្ទីរពេទ្យ ទទួលថ្នាំ និងថែរក្សាសុខភាពនៅផ្ទះខ្លួនឯងសិន ទំរាំស្ថានការណ៍ល្អប្រសើរ ទើបក្រុមការងារស្ថានទូតសម្របសម្រួលលិខិតឯកសារបើកផ្លូវ សម្រាប់បងប្រុសពលករនេះអាចត្រឡប់មកស្រុកវិញបាន។
សកម្មភាពនេះជាគំរូល្អដល់អ្នកដទៃ គឺដាច់ខាតមិនត្រូវបោះបង់ជនរួមជាតិខ្លួនឯងចោលនៅលើទឹកដីគេនោះទេ ដូចទៅនឹងពាក្យចាស់ពោលថា នៅផ្ទះម្តាយទីទៃ នៅព្រៃម្តាយតែមួយ។
