ល្បិចបោកថ្មី! ជនជាតិនីហ្សេរីយ៉ា ២ រូបត្រូវចាប់ខ្លួននៅស្រុកខ្មែរ ដោយបោកប្រាស់តាមវិធីថ្មី សុំរាប់អាន ស្រឡាញ់ ហើយផ្ញើឥវ៉ាន់សម្ភារៈ ពីក្រៅប្រទេស

កម្ពុជា៖ ល្បិចថ្មីទៀតហើយ! សូមបងប្អូនប្រុងប្រយ័ត្នខ្ពស់ ចំពោះការចាញ់បោក តាមរយៈ ការរាប់អាន សុំស្រឡាញ់ ហើយផ្ញើឥវ៉ាន់សម្ភារៈ ពីក្រៅប្រទេស។

ក្រោយពីទទួលបានពាក្យបណ្ដឹងរបស់ប្រជាពលរដ្ឋ ពាក់ព័ន្ធនឹងការឆបោក តាមប្រព័ន្ធបច្ចេកវិទ្យាព័ត៌មាន និងក្រោមការចង្អុលបង្ហាញពី ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ នាយកដ្ឋានប្រឆាំងបទល្មើសបច្ចេកវិទ្យា ក្រោមការដឹកនាំបញ្ជាផ្ទាល់ពី ឯកឧត្តម ឧត្តមសេនីយ៍ឯក ជា ពៅ នៅថ្ងៃទី ០២ ខែមករា ឆ្នាំ២០២១ បានធ្វើការស្រាវជ្រាវ រហូតដល់មានការឃាត់ខ្លួនជនសង្ស័យចំនួន០២នាក់÷ ១-ឈ្មោះ KINGSLEY OBINNA NWEAZURA ភេទប្រុស អាយុ ២៦ឆ្នាំ ជនជាតិនីហ្សេរីយ៉ា និង ២-ឈ្មោះ EMMA EKE ONYECHERE ភេទប្រុស អាយុ ៣៥ឆ្នាំ ជនជាតិនីហ្សេរីយ៉ា នៅចំណុច ផ្ទះលេខ ភូមិ សង្កាត់ ខណ្ឌ រាជធានីភ្នំពេញ នាំមកនាយកដ្ឋានប្រឆាំងបទល្មើសបច្ចេកវិទ្យា ដើម្បីចាត់ការតាមនីតិវិធី។

បច្ចុប្បន្ន ជនសង្ស័យទាំងនេះ ត្រូវបានបញ្ជូនទៅកាន់អយ្យការអមសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់។

ឯកឧត្តម ឧត្តមសេនីយ៍ឯក ប្រធាននាយកដ្ឋាន សូមក្រើនរំឭកដល់បងប្អូនប្រជាពលរដ្ឋ ឱ្យមានស្មារតីប្រុងប្រយ័ត្នខ្ពស់ ចំពោះការប្រើប្រាស់តាមមធ្យោបាយបច្ចេកវិទ្យាព័ត៌មាន ។

នាយកដ្ឋានបានបញ្ជាក់ថា ក្នុងប្រព័ន្ធបណ្តាញសង្គម សូមកុំទទួលមិត្តភក្តិ ( Accept Friend ) ដែលមិនមានប្រភពច្បាស់លាស់ ឬ កុំជឿតាមការលួងលោម ឬសន្យា ថានឹងអោយ ឬផ្ញើ សម្ភារ ឬ កាដូពីក្រៅប្រទេស ឡើយ តែតម្រូវអោយយើងជួយបង់ថ្លៃសេវាផ្សេងៗ សម្រាប់ការដឹកជញ្ជូនមក៕






Leave a Reply

Your email address will not be published. Required fields are marked *