កម្ពុជា៖ កាលពីថ្ងៃ៣១ ខែធ្នូ ចុងឆ្នាំ២០២០កន្លងទៅនេះ ធនាគារអេស៊ីលីដា ភីអិលស៊ី ដែលជាធនាគារដ៏ធំជាងគេមួយនៅកម្ពុជា បានធ្វើការផ្លាស់ប្តូររូបរាងស្លាកសញ្ញាថ្មី ជាផ្លូវការ ដែលក្នុងនោះក៏បានរក្សានូវនិមិត្តរូប អត្តសញ្ញាណ និងអត្ថន័យដែលធនាគារដ៏ធំនេះបានកសាងមកជាង២៩ឆ្នាំមកផងដែរ។
រូបរាងស្លាកសញ្ញាថ្មីនេះ មានភាពទាន់សម័យ សាកសមជារូបសញ្ញាតំណាងឱ្យប្រព័ន្ធសេវាកម្មធនាគារទំនើបនៅក្នុងបរិបទថ្មីនៃបច្ចេកវិទ្យានាពេលបច្ចុប្បន្ន។ បើតាមការបង្ហោះពីខ្លឹមសារនៃរូបរាងស្លាកសញ្ញាថ្មីនេះ នៅក្នុងគេហទំព័ររបស់ធនាគារអេស៊ីលីដា ភីអិលស៊ីផ្ទាល់ ស្លាកសញ្ញាថ្មី ធនាគារ អេស៊ីលីដា ភីអិលស៊ី នេះជា “និមិត្តរូបបក្សីសួគ៌” ឈរនៅចំកណ្តាលរង្វង់មូលពណ៌ខៀវទឹកប៊ិក ដែលបង្ហាញពីភាពរឹងមាំ និងវឌ្ឍនភាពប្រកបដោយចីរភាព
ចំណែកពណ៌នៃស្លាកសញ្ញាថ្មី គឺមានបីពណ៌ គឺពណ៌ស ពណ៌មាស និងពណ៌ខៀវទឹកប៊ិក។ អត្ថន័យ នៃពណ៌ស្លាកសញ្ញាថ្មីរបស់ ធនាគារ អេស៊ីលីដា ភីអិលស៊ី
-ពណ៌ ស៖ អភិសមាចារ (តម្លាភាព ភាពស្មោះត្រង់ និងសុចរិតភាព)
-ពណ៌ មាស៖ គុណតម្លៃ និងគុណភាព
-ពណ៌ ខៀវទឹកប៊ិក៖ សាមគ្គីភាព ស្ថិរភាព និងសុវត្ថិភាព។
ពណ៌ទាំងបីបញ្ចូលគ្នាប្រៀបទៅនឹងគ្រាប់ពូជ និងធនធានដែលបានរីកដុះដាល និងអភិវឌ្ឍក្នុងវិស័យហិរញ្ញវត្ថុ ប្រកបដោយចីរភាព។ ស្លាកសញ្ញាថ្មីនេះ នឹងរៀបចំដាក់ឲ្យប្រើប្រាស់ ជាផ្លូវការចាប់ពីខែមករា ឆ្នាំ២០២១ ខាងមុខនេះ។
សូមបញ្ជាក់ថាធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួន ៤ (បួន) គឺអេស៊ីលីដា ស៊ីឃ្យួរឹធី ភីអិលស៊ី, វិទ្យាស្ថាន ពាណិជ្ជសាស្ត្រ អេស៊ីលីដា, ធនាគារ អេស៊ីលីដា ឡាវ លីមីធីត, និងស្ថាប័ន មីក្រូហិរញ្ញវត្ថុ អេស៊ីលីដា មីយ៉ាន់ម៉ា និងព្រមទាំងមានការិយាល័យតំណាងនៅសាធារណរដ្ឋសហភាពមីយ៉ាន់ម៉ា។
គិតត្រឹមដំណាច់ខែកញ្ញា ឆ្នាំ២០២០ នេះ ធនាគារ អេស៊ីលីដា ភីអិលស៊ី មានទ្រព្យសកម្មសរុបចំនួន ២៦,១០ ទ្រីលានរៀល (ឬ ៦,៣៧ ប៊ីលានដុល្លារអាមេរិក) សមតុល្យ ឥណទានសរុបចំនួន ១៦,៩៩ ទ្រីលានរៀល (ឬ ៤,១៤ ប៊ីលានដុល្លារអាមេរិក) និងប្រាក់បញ្ញើសន្សំសរុបចំនួន ១៨,៥៦ ទ្រីលានរៀល (ឬ ៤,៥៣ ប៊ីលានដុល្លារអាមេរិក) និងចំនួនអ្នកចុះឈ្មោះប្រើប្រាស់សេវាធនាគារ ឌីជីថល អេស៊ីលីដា ទាន់ចិត្ត ច្រើនជាង ១,៦២លាននាក់ គិតត្រឹមដំណាច់ខែកញ្ញា ឆ្នាំ២០២០។
