សម្តេច ហ៊ុន សែន៖ គ្មានឡើយការស្នើសុំដាក់ប្រទេសក្នុងគ្រាអាសន្ន និងមិនមានការបិទរាជធានីភ្នំពេញតាមការឃោសនាភូតកុហកទេ

ភ្នំពេញ៖ ក្រោយពីមានពាក្យចចាមអារ៉ាមបន្តលើកឡើងពីការប្រកាសដាក់ប្រទេសក្នុងភាពអាសន្ននៅក្នុងថ្ងៃអាទិត្យនេះ បន្ទាប់ពីសម្តេចតេជោបានបញ្ជាក់ពីការត្រៀមរួចរាល់នូវលិខិតនានា ដើម្បីនឹងសុំព្រះរាជក្រឹត្យដាក់ប្រទេសក្នុងគ្រាមានអាសន្ននោះ នាវេលាយប់ថ្ងៃអាទិត្យដដែលនោះ តាមរយៈទំព៍រហ្វេសប៊ុកសម្តេចតេជោ ហ៊ុន សែន បានបញ្ជាក់ពីការបដិសេធលើពាក្យចចាមអារ៉ាមទាំងអស់នោះចោល។

សម្តេចបានសរសេររៀបរាប់ក្នុងទំព័រហ្វេសប៊ុកថា «ព្រឹកមិញ ខ្ញុំបាននិយាយដល់ការត្រៀមបំរុងទុកនូវលិខិតនានា ដើម្បីនឹងសុំព្រះរាជក្រឹត្យដាក់ប្រទេសក្នុងគ្រាមានអាសន្ន។ ក្នុងពេលជាមួយគ្នា ខ្ញុំក៏បានបញ្ជាក់ថា ខ្ញុំមិនចង់ទៅដល់ចំណុចនេះទេ ព្រោះវាប៉ះពាល់ធំពេកដល់សេដ្ឋកិច្ចនិងជីវភាពប្រជាជនដែលខ្ញុំស្នើសុំឱ្យមានការចូលរួមពីប្រជាជន ដើម្បីប្រយុទ្ធប្រឆាំងជាមួយកូវីដ១៩ជំនួសវិញ។ ពេញមួយថ្ងៃនេះ ការបំភ្លើសនានាបានកើតឡើងថានឹងមានការបិទប្រទេសឬបិទរាជធានីភ្នំពេញក្នុងពេលប៉ុន្មានថ្ងៃខាងមុខនេះ ហើយបំផុសឱ្យមនុស្សទិញទំនិញត្រៀមទុក។ ចំពោះមុខពាក្យភូតកុហកបែបនេះ ក្នុងឋានៈខ្ញុំជាប្រមុខនៃរាជរដ្ឋាភិបាល ខ្ញុំសូមបញ្ជាក់ជូនថានឹងមិនមានការស្នើសុំដាក់ ប្រទេសក្នុងគ្រាមានអាសន្នទាំងមូលឬមួយផ្នែកណានោះឡើយ ហើយក៏នឹងមិនមានការចេញបទបញ្ជារឱ្យបិទរាជធានីភ្នំពេញដូចការឃោសនាភូតកុហក់របស់ជនអាក្រក់នោះដែរ។ ខ្ញុំសូមអំពាវនាវប្រជាពលរដ្ឋស្ងប់ស្ងាត់កុំភ័យស្លន់ស្លោ និងសូមចូលរួមជាមួយរាជរដ្ឋាភិបាលក្នុងការប្រយុទ្ធប្រឆាំងជាមួយកូវីដ១៩ តាមការណែនាំរបស់ក្រសួងសុខាភិបាល៕»

Leave a Reply

Your email address will not be published. Required fields are marked *