សេអ៊ូល៖ ចាប់ពីថ្ងៃចន្ទស្អែកនេះទៅ សិស្សសាលានៅទីក្រុងសេអ៊ូលនឹងអាចទៅរៀនផ្ទាល់ក្នុងថ្នាក់បានដល់ចំនួន ២/៣ នៃសិស្សសរុប ទៅតាមវិធានការថ្មីដែលក្រសួងអប់រំកូរ៉េ ទើបនឹងដាក់ចេញឱ្យអនុវត្តក្រោយជម្ងឺកូវីដ-១៩ ហាក់មានសញ្ញានៃការថមថយកាន់តែច្រើនហើយនោះ។
ក្នុងការអនុវត្តថ្មី ដែលនឹងចាប់ផ្តើមពីថ្ងៃស្អែកនេះទៅ គ្រប់សាលានៅក្នុងទីក្រុងសេអ៊ូល និងទីប្រជុំជនធំៗជុំវិញ នឹងត្រូវអនុញ្ញាតឱ្យមានសិស្សមករៀនផ្ទាល់ក្នុងថ្នាក់ដល់ចំនួន ២/៣ នៃសិស្សសរុប សម្រាប់គ្រប់កម្រិតតាំងពីបឋមសិក្សា ដល់កម្រិតវិទ្យាល័យ។ ចំណែកឯសាលារៀនដែលនៅតំបន់ផ្សេងៗទៀតទូទាំងប្រទេសកូរ៉េ អាចមានភាពបត់បែនជាងក្នុងការអនុវត្តវិធានការគម្លាតសង្គមតាមថ្នាក់រៀននេះ ដោយផ្អែកទៅតាមស្ថានការណ៍ជាក់ស្តែងនៅតំបន់នោះផ្ទាល់។
ក្រសួងអប់រំកូរ៉េលើកឡើងថា ការបង្កើនចំនួនសិស្សមករៀនផ្ទាល់ក្នុងថ្នាក់នេះ គឺដើម្បីបន្ស៊ាំកូនសិស្សទៅនឹងបរិយាកាសក្នុងថ្នាក់រៀនវិញម្តងបន្តិចៗ ដោយសារតែការខកខានរៀនក្នុងថ្នាក់ផ្ទាល់អស់ជាច្រើនខែកន្លងមក។ ក្នុងនោះដែរ ការបង្កើនចំនួនសិស្សនេះ ក៏តម្រូវឱ្យមានការអនុវត្តវិធានការអនាម័យផ្សេងៗទៀតផងដែរ ក្នុងគោលបំណងបង្ការហានិភ័យនៃការឆ្លងមេរោគកូរ៉ូណានេះ។
សូមបញ្ជាក់ថា មុនពេលចេញវិធានការថ្មីនេះ សាលារៀននៅក្នុងទីក្រុងសេអ៊ូល និងប្រជុំជនជុំវិញតម្រូវឱ្យមានសិស្សរៀនក្នុងថ្នាក់ផ្ទាល់ត្រឹម ១/៣ នៃសិស្សសរុបសម្រាប់កម្រិតថ្នាក់បឋមសិក្សា និងអនុវិទ្យាល័យ និង២/៣ នៃសិស្សសរុបសម្រាប់តែថ្នាក់វិទ្យាល័យប៉ុណ្ណោះ។
