CamboFinance៖ ពិតហើយភាពក្រីក្រកើតមាននៅគ្រប់បរិបទសង្គមនៅក្នុងពិភពលោក។ ប៉ុន្តែអ្វីជានិយមន័យ ភាពក្រីក្រ?
តើតម្រូវការមីកញ្ចប់នាពេលចុងខែ អាចកំណត់បានថាអ្នកស្ថិតក្នុងភាពក្រីក្រឬទេ?
• ភាពក្រីក្រ មិនមែនត្រូវបានកំណត់ដោយផ្អែកតែលើចំណូលអ្នកតែមួយមុខនោះទេ តែក៏បានបូកបញ្ជូលនូវកត្តាផ្សេងៗដែលធ្វើអោយជីវភាពរស់នៅរបស់អ្នកប្រកបដោយនិរន្តរភាព។ កត្តានោះមានដូចជា៖ ភាពអត់ឃ្លាននិងកង្វះអាហារូបត្ថម្ភ, សុខភាពមិនល្អ, ការមានកំណត់ ឬកង្វះលទ្ធភាពទទួលបានការអប់រំ និងសេវាកម្មមូលដ្ឋានផ្សេងទៀត, ការកើនឡើងអត្រាមរណភាព និងជំងឺ, ភាពគ្មានផ្ទះសម្បែង និងលំនៅដ្ឋានមិនគ្រប់គ្រាន់, បរិស្ថានគ្មានសុវត្ថិភាព, និងការរើសអើងពីសង្គម
ទោះជាយ៉ាងណាក៏ដោយ តម្រូវការរបស់មនុស្សជាមូលដ្ឋានរួមមានអាហារ ទឹក អនាម័យ ទីជម្រក ការអប់រំ និងព័ត៌មាន គឺជាចំនុចដែលបានគាំពារដោយអង្គការសហប្រជាជាតិ។
ដូច្នេះ តើធ្វើយ៉ាងណាទើបដឹងថាបន្ទាត់ក្រីក្រនៅត្រឹមណា? មានអ្វីយកមកវ៉ាស់?
• វិធីទីមួយ៖ គឺកំណត់យកតាម ធនាគារពិភពលោក (World Bank) ដែលមានឈ្មោះថា ‘International Poverty Line (IPL)’ ដែលបានចាប់យកតម្លៃ $1.90 ជាតួលេខបង្គោល។ បានន័យថា អ្នកដែលរកចំណូលបានក្រោម $1.90 ក្នុងមួយថ្ងៃ ត្រូវបានចាត់ទុកស្ថិតក្រោមបន្ទាត់ភាពក្រីក្រ។
• វិធីទីពីរ៖ គឺកំណត់ដោយ UNDP ដែលមានឈ្មោះថា ‘Multidimensional Poverty Index (MPI)’។ វិធីនេះកំណត់យក ៣ ចំណុចធំៗ មកធ្វើការវាយតម្លៃរួមមាន សុខភាព ការអប់រំ និង ស្តង់ដារនៃការរស់នៅ។ ក្នុងចំណោមសូចនការទាំងបីនេះ មាន ១០ ចំនុចតូចៗ ហើយបើ ១/៣ (មួយភាគបី) នៃចំណុចទាំងដប់នេះ មិនអាចសម្រេចបាននោះទេ នោះមានន័យថាអ្នកអាចចាត់ចូលជា ‘multidimensionally poor’។
សរុបសេចក្តីមក ការដាច់លុយចុងខែ មិនមែនមានន័យថាអ្នកស្តិតក្នុងភាពក្រីក្រនោះទេ ដរាបណាអ្នករកចំណូលបានលើស $1.90 ក្នុងមួយថ្ងៃ ហើយអ្នកមានជំរក អាហារ ទឹក អនាម័យ ការអប់រំ នោះអ្នកមិនស្ថិតក្នុងភាពក្រីក្រនោះទេ។
ខ្លឹមសារអត្ថបទពី៖ CamboFinance
