នៅកម្ពុជា ក្រោយពីខកខានការឈប់សម្រាកពេលចូលឆ្នំាកន្លងមក រដ្ឋាភិបាលបានអនុញ្ញាតឱ្យឈប់សម្រាកសងវិញចាប់ពីថ្ងៃចន្ទស្អែកទៅ ដែលមានរយៈពេលយូរដល់មួយសប្តាហ៍ពេញ។ ឈប់សម្រាកយូរចឹង តើគួរបបួលក្រុមគ្រួសារ និងមិត្តភក្តិទៅលេងនៅកន្លែងណាខ្លះទៅហ្ន?
ខាងក្រោមនេះ ជាកន្លែងថ្មីមួយចំនួននៅភ្នំពេញ សៀមរាប និងបាត់ដំបង ដែលលោកអ្នកអាចទៅកំសាន្តបានក្នុងអំឡុងពេលឈប់សម្រាកនេះ៖
ទីក្រុងភ្នំពេញ ៖
១. Garden City Water Park (សួនទឹកលីយ៉ុងផាត) ៖ ជាសួនទឹកដ៏ធំជាងគេដំបូងបង្អស់នៅកម្ពុជា នឹងបើកដំណើរការជាផ្លូវការ នៅថ្ងៃទី១៧ ខែសីហា ឆ្នាំ ២០២០ រួមជាមួយនឹងឧបករណ៍លេងកម្សាន្តជាច្រើនប្រភេទ អាចធានាបាននូវសុវត្ថិភាព និងផាសុកភាព សម្រាប់មនុស្សគ្រប់វ័យ។
ទីតាំង ៖ ស្ថិតនៅតាមបណ្តោយមហាវិថីវិមានឈ្នះឈ្នះ ភូមិព្រែកតារ័ត្ន ឃុំព្រែកតាសេក ខណ្ឌជ្រោយចង្វារ រាជធានីភ្នំពេញ។
២. Dinosaurs Alive ៖ ជាសួនកម្សាន្តដាយណូស័រធំជាងគេបង្អស់នៅកម្ពុជា ដែលឪពុកម្តាយអាចនាំកូនតូចៗទៅលេង ដើម្បីស្វែងយល់អំពីប្រភេទ ដាយណូស័រនីមួយៗ ដើមឈើធំៗ ដែលផ្តល់ម្លប់ និងខ្យល់អាកាសត្រជាក់។
ទីតាំង ៖ ទីក្រុងរណបជ្រោយចង្វារ ។
៣. Phnom Penh Fantasy World ៖ គឺជាសួនកម្សាន្តមានទំហំប្រមាណ ១ហិចតាដែលមានឧបករណ៍លេងកម្សាន្តដូចជា កន្ត្រកវិល, ប៉មហោះហើរ, កប៉ាល់ចោរសមុទ្រ, ថាសUFO, ទូករអិលធ្លាក់ទឹក, រ៉ូលល័រខូស្ទ័រ និងឧបករណ៍លេងជាច្រើនទៀត។
ទីតាំង ៖ ទីក្រុងរណបជ្រោយចង្វារ ។
ខេត្តសៀមរាប ៖
១. ទៅជិះកង់លេងក្នុងព្រឹត្តិការណ៍ «សម្រាកសៀមរាប» (រៀបចំដោយ សាលាខេត្តសៀមរាប) ៖ នាថ្ងៃទី ១៦-២១ ខាងមុខនេះ សាលា ខេត្តសៀមរាប នឹងរៀបចំកម្មវិធី ជិះកង់សប្បុរសធម៌ ក្នុងគោលបំណងរៃអង្គាសមូលនិធិជួយទ្រទ្រង់ដល់មន្ទីរពេទ្យ គន្ធបុប្ផា និង មន្ទីរពេទ្យកុមារខេត្តសៀមរាប។ នេះជាឱកាសដែលអ្នកអាចទៅដើរលេងកម្សាន្តផង និងអាចចូលរួមជួយដល់សង្គមផង ម្យ៉ាងការជិះកង់ថែមទាំងល្អចំពោះសុខភាពទៀត។ ក្នុងព្រឹត្តិការណ៍នេះក៏នឹងមានកម្មវិធីសប្បាយៗជាច្រើនទៀតផងដែរ។
២. Microlight Cambodia ៖ គឺជាការជិះយន្តហោះបែបកែច្នៃ ដើម្បីមើលទេសភាពដ៏ស្រស់បំព្រងនៃខេត្តសៀមរាបពីលើអាកាស ។
ទីតាំង ៖ ផ្លូវជាតិលេខ ៦ អាកាសយានដ្ឋានជ័យវរ្ម័ន ខេត្តសៀមរាប។
៣. Happy Ranch Horse Farm ៖ គឺជាការជិះសេះលេងកម្សាន្ត នៅភូមិដាច់ស្រយាល តាមវាលស្រែ តំបន់ប្រាសាទដែលមនុស្សគ្រប់គ្នាកម្រទៅដល់។
ទីតាំង ៖ ក្រុមទី ៤, ស្វាយដង្គុំ, ក្រុងសៀមរាបអង្គរ ។
៤. ការជិះទូកកម្សាន្តនៅភូមិបណ្តែតទឹក ៖ លើដងទន្លេសាប នឹងផ្តល់នូវអារម្មណ៍ប្លែក និងស្រស់ថ្លា ដោយប្តូរពីការជិះឡាន ម៉ូតូ ហិតផ្សែងពុល មកជាការជិះទូកស្រូបយកខ្យល់អាកាសបរិសុទ្ធ ហើយអាចមើលជីវភាពប្រចាំថ្ងៃរបស់អ្នកភូមិដែលរស់នៅតាមដងទន្លេទៀត។ ពេលវេលាដែលសក្តិសមបំផុតក្នុងការជិះទូកនេះ គឺនៅពេលល្ងាច ព្រោះថាយើងអាចមើលឃើញថ្ងៃលិចដ៏ស្រស់ស្អាត។
ទីតាំង ៖ ភូមិអណ្តែតទឹក, បឹងទន្លេសាប ។
៥. ជិះកន្ត្រកវិល ៨៥ ម៉ែត្រ (Angkor Eye)៖ Angkor Eye ជាកន្រ្តកយក្សដ៏ធំនៅកម្ពុជា និងខ្ពស់លំដាប់លេខ៣ នៅតំបន់អាស៊ី ដែលមានកម្ពស់ ៨៥ម៉ែត្រពីដី អាចឲ្យអ្នកជិះទស្សនាទេសភាពក្រុងសៀមរាបបាន ៣៦០ ដឺក្រេក្នុងរយៈពេល ១៨ នាទី និងមើលឃើញព្រះអាទិត្យអស្ដង្គតយ៉ាងស្រស់ស្អាតផងដែរ។ គ្រប់កន្រ្តកទាំងអស់សុទ្ធតែមានបំពាក់ទៅដោយម៉ាស៊ីនត្រជាក់ មានសុវត្ថិភាព និងស្ដង់ដារខ្ពស់របស់ប្រទេសជប៉ុន
ទីតាំង៖ នៅខាងកើតមជ្ឈមណ្ឌលភូមិវប្បធម៌កម្ពុជា។
ខេត្តបាត់ដំបង ៖
១. Green Orange Kayaks ៖ វាពិតជាប្លែកដែលយើងអាចសាកល្បងជិះកាយាក់នៅតាមដងស្ទឹងសង្កែ ទៅកាន់តំបន់ជាយៗ នៃខេត្តបាត់ដំបងដើម្បីមើលជីវភាពរស់នៅរបស់បងប្អូនកសិករ និងអ្នករស់នៅតាមដងស្ទឹងនោះ។
ទីតាំង ៖ ដងស្ទឹងសង្កែ ខេត្តបាត់ដំបង។
២. បឹងកំពីងពួយ ៖ ជាកន្លែងប្រវត្តិសាស្រ្ត ដែលបានបន្សល់ពីជំនាន់ប៉ុល ពត ។ សព្វថ្ងៃកន្លែងនោះបានកែប្រែជាបឹងដ៏មានទេសភាពស្រស់ត្រកាលពោរពេញដោយផ្កាឈូកដុះស្កេះស្កះ សម្រាប់ឲ្យភ្ញៀវទេសចរជាតិ និងអន្តរជាតិមកទស្សនាលំហែអារម្មណ៍។
ទីតាំង ៖ ភូមិតាង៉ែត, ឃុំតាក្រៀលស្រុក, ចំងាយប្រហែល ៣៥ គីឡូម៉ែត្រខាងលិចទីរួមខេត្តបាត់ដំបង ។
៣. ព្រែកទាល់ ៖ ស្ថិតនៅបណ្តោយបឹងទន្លេសាប ដែលអ្នកអាចជិះកាត់ព្រែកនេះទៅដល់ខេត្តសៀមរាបបាន។ ព្រែកទាល់ជាតំបន់ដែលសម្បូរសត្វស្លាបដ៏កម្រជាច្រើនប្រភេទ និងមានទេសភាពស្រស់ស្អាតប្លែកភ្នែក ។
ទីតាំង ៖ ស្រុកឯកភ្នំ ខេត្តបាត់ដំបងជាប់ព្រំប្រទល់ទឹករវាងខេត្តបាត់ដំបង និងខេត្តសៀមរាប។
ខ្លឹមសារដកស្រង់ពី៖ Sabay News