ព្រះរាជាណាចក្រកម្ពុជា និងសាធារណរដ្ឋកូរ៉េមានទំនាក់ទំនងជាមួយយ៉ាងជិតស្និតលើគ្រប់វិស័យ ទាំងវិស័យការទូត សេដ្ឋកិច្ច ពាណិជ្ជកម្ម វប្បធម៌ និងទំនាក់ទំនងប្រជាជន។ តើមានដែលដឹងឬទេថាកម្ពុជា និងកូរ៉េចាប់ផ្តើមប្រវត្តិទំនាក់ទំនងដ៏ស្អិតរមួតនេះតាំងពីពេលណាមក?
ទំនាក់ទំនងរវាងកម្ពុជា និងកូរ៉េខាងត្បូង ចាប់ផ្តើមឡើងដំបូងតាំងពីឆ្នាំ១៩៧០ ក្រោមរដ្ឋាភិបាលរបបសាធារណរដ្ឋកម្ពុជា។ ទំនាក់ទំនងនោះមានរយៈពេលខ្លីដូចគ្នាទៅនឹងរបបសាធារណរដ្ឋកម្ពុជាដែរ ដោយត្រូវបានកាត់ផ្តាច់ទាំងស្រុងនៅពេលដែលរបបកម្ពុជាប្រជាធិបតេយ្យបានគ្រប់គ្រងកម្ពុជានៅឆ្នាំ១៩៧៥។ ទំនាក់ទំនងនេះត្រូវបានចាប់ផ្តើមឡើងវិញជាផ្លូវការនៅថ្ងៃទី៣០ តុលា ១៩៩៧។
រហូតមកដល់បច្ចុប្បន្ននេះ ទំនាក់ទំនងផ្លូវការរវាងរដ្ឋទាំងពីរមានរយៈពេល ២២ ឆ្នាំមកហើយ ដែលបានឃើញការកើនឡើងនូវកិច្ចសហប្រតិបត្តិការស៊ីជម្រៅលើគ្រប់វិស័យ និងគ្រប់កម្រិត។
ក្នុងនោះដែរ ដោយសារទំនាក់ទំនងរវាងរដ្ឋទាំងពីរកាន់តែមានភាពស៊ីជម្រៅ រដ្ឋទាំងពីរបានចាប់ផ្តើមបង្កើតជាស្ថានទូតតំណាងនៅប្រទេសទាំងសងខាង។
ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ ត្រូវបានបង្កើតឡើងតាមរយៈអនុក្រឹត្យលេខ២៥ អនក្រ.បក ចុះថ្ងៃទី ២០ កុម្ភៈ ឆ្នាំ២០០១ ស្តីពីការបង្កើតស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ។
ស្ថានឯកអគ្គរាជទូតកម្ពុជាដំបូងដែលពលរដ្ឋខ្មែរនៅកូរ៉េជាច្រើនបានស្គាល់ និងមានអនុស្សាវរីយ៍ជាច្រើនកន្លងមកនោះ មានទីតាំងនៅផ្ទះ ៦៥៣-១១០ Hannam-dong, Yongsan-gu, ទីក្រុងសេអ៊ូល។
បច្ចុប្បន្នស្ថានឯកអគ្គរាជទូតកម្ពុជាបានផ្លាស់ប្តូរមកទីតាំងថ្មី ដែលមានទំហំធំទូលាយ និងលក្ខណៈសម្បូរបែបជាងមុន ដែលមានទីតាំងនៅជាន់ទី១៤ អាគារប៊ូយ៉ុង ៥៥ ផ្លូវសេចុង ខណ្ឌដុង រដ្ឋធានីសេអ៊ូល ប្រអប់សំបុត្រលេខ ០៤៥១៣។ គេអាចធ្វើដំណើរមកបានតាមរយៈ រថភ្លើងខ្សែលេខ 1 ច្រកលេខ ៨ ដើរត្រង់ចម្ងាយ ៣០០ម៉ែត្រប៉ុណ្ណោះ។
លេខទូរស័ព្ទទំនាក់ទំនង៖ 02-3785-1041 រៀងរាល់ថ្ងៃចន្ទ ដល់សុក្រ ពេលព្រឹកម៉ោង ០៩:០០ ដល់ ១២:០០ និងរសៀលម៉ោង ១៤:០០ ដល់១៧:០០។
សូមបញ្ជាក់ថា ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េជាសេនាធិការឱ្យក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា ដែលមានបេសកកម្មដោយសង្ខេបដូចខាងក្រោម៖
- អនុវត្ត និងផ្សព្វផ្សាយគោលនយោបាយរាជរដ្ឋាភិបាល ក្នុងបេសកកម្មការពារឯករាជ្យភាព អធិបតេយ្យភាព បូរណភាពដែនដី និងលើកកម្ពស់កិត្យានុភាពកម្ពុជាលើឆាកអន្តរជាតិ
- ការពារ និងលើកកម្ពស់ផលប្រយោជន៍ជាតិ និងពលរដ្ឋខ្មែរនៅបរទេស
- ផ្តល់សេវាកម្មគតិយុត្ត ការគាំពារ គាំទ្រ និងលើកកម្ពស់សិទ្ធិ អត្ថប្រយោជន៍ពលករខ្មែរ
- ពង្រឹង និងពង្រីកទំនាក់ទំនងរវាងកម្ពុជា និងរដ្ឋជាម្ចាស់ផ្ទះ និងរដ្ឋនានា
- ពង្រឹងការទូតសេដ្ឋកិច្ច ពាណិជ្ជកម្ម វិនិយោគ ធុរកិច្ច ទេសចរណ៍ អប់រំ បចេ្ចកវិទ្យាជាដើម និង
- អនុវត្តភារកិច្ចផ្សេងៗតាមការចាត់តាំងពីក្រសួងការបរទេស និងសហប្រតិបត្តិការអន្តរជាតិ។
