កូរ៉េខាងត្បូង៖ ជនល្មើសជនជាតិកូរ៉េម្នាក់ជាបុរសអាយុ ៣៦ឆ្នាំម្នាក់ ត្រូវបានកាត់ទោសឱ្យជាប់គុករយៈពេល ៣៥ ឆ្នាំកាលពីថ្ងៃព្រហស្បតិ៍នេះពីបទសម្លាប់អតីតមិត្តស្រីរបស់គាត់យ៉ាងឃោរឃៅ ដែលគាត់បានលួចតាមដានអស់រយៈពេលជាច្រើនខែបន្ទាប់ពីគូស្នេហ៍នេះបានបែកបាក់គ្នារួចហើយនោះ។
ជនល្មើសឈ្មោះ គីម ព្យុងចាន់ (Kim Byung-chan) ត្រូវបានតុលាការកាត់សេចក្តីឱ្យមានទោស លើករណីបទចាក់សម្លាប់ជនរងគ្រោះជាច្រើនដងនៅបន្ទប់ទះអាផាតិមិនរបស់នាងនៅកណ្តាលក្រុងសេអ៊ូល កាលពីខែវិច្ឆិកាឆ្នាំមុន។ បុរសជាជនល្មើស និងជាអតីតសង្សារនេះ បានតាមឃ្លាំមើល និងតាមដានជនរងគ្រោះចាប់តាំងពីពេលដែលពួកគេបានបែកបាក់គ្នារួចមក ពីពាក់កណ្តាលឆ្នាំ២០២០។
ជាមួយនឹងការកាត់សេចក្តីឱ្យមានទោសនេះ ជនល្មើសនឹងត្រូវជាប់ឃុំឃាំងរយៈពេល៣៥ឆ្នាំហើយ តុលាការក្រុងសេអ៊ូលក៏បានបញ្ជាឱ្យគាត់ត្រូវពាក់ឧបករណ៍តាមដានរយៈពេល ១៥ឆ្នាំបន្ថែមទៀតផងដែរ។ បើតាមការទាមទាររបស់អយ្យការពីដំបូង គឺស្នើឱ្យតុលាការកាត់ទោសជនល្មើសឱ្យរងការកាត់ទោសជាប់ឃុំឃាំងមួយជីវិត តែមិនបានសម្រេច។
ករណីនេះបានទាក់ទាញចំណាប់អារម្មណ៍សាធារណជនយ៉ាងខ្លាំង ជាពិសេសគឺការខឹងសម្បារទៅលើស្ថានការណ៍ដែលត្រូវបានគេបង្ហាញឱ្យដឹងថា នៅមុនពេលកើតហេតុជនរងគ្រោះបានដាក់ពាក្យបណ្តឹងថាជនល្មើសបានតាមឃ្លាំមើលខ្លួន ទៅកាន់ប៉ុស្តិ៍ប៉ូលិសដល់ទៅ៤ដង ហើយត្រូវបានប៉ូលិសសម្រេចដាក់ជនរងគ្រោះស្ថិតក្រោមការតាមការពារពិសេស។ ស្ត្រីជនរងគ្រោះរូបនេះក៏បានទទួលដីកាពីតុលាការ ហាមឃាត់មិនឱ្យជនល្មើសចូលមកជិតខ្លួនផងដែរ។
តែនៅចំថ្ងៃកើតហេតុ ជនរងគ្រោះបានទាក់ទងទូរស័ព្ទទៅប៉ូលិសបន្ទាន់ដល់ទៅ ២ដង តាមរយៈឧបករណ៍នាឡិកាឆ្លាតវៃដែលផ្តល់ដោយប៉ូលិស តែយ៉ាងណាក៏ដោយ ក្រុមសមត្ថកិច្ចប៉ូលិសបានមកដល់កន្លែងកើតហេតុយឺតពេលទៅហើយ និងមិនអាចបញ្ឈប់អំពើឃាតកម្មបាននោះទេ ដែលបញ្ហានេះកើតឡើងដោយសារតែឧបករណ៍នាឡិកាឆ្លាតវៃដែលប៉ូលិសផ្តល់ជូនជនរងគ្រោះសម្រាប់ទាក់ទងនោះមិនដំណើរការ។
សូមបញ្ជាក់ថា ប៉ូលីសកូរ៉េបានបង្ហាញជាសាធារណៈនូវព័ត៌មានផ្ទាល់ខ្លួនរបស់ជនល្មើស កាលពីឆ្នាំមុន រួមទាំងឈ្មោះរបស់គាត់ និងរូបថតមុខរបស់គាត់ ដែលជាសមត្ថកិច្ចរបស់ប៉ូលីសក្នុងការបង្ហាញចេញអត្តសញ្ញាណជនល្មើស សម្រាប់ករណីដែលគេចាត់ទុកថាជាបទឧក្រិដ្ឋធ្ងន់ធ្ងរ។
