កូរ៉េខាងត្បូង៖ យ៉ាងហោចណាស់មនុស្សជិត ១៥ នាក់ក្នុងចំណោម ១០០ នាក់ ដែលមានការងារនៅក្នុងប្រទេសកូរ៉េខាងត្បូងបានផ្លាស់ប្តូរការងារក្នុងឆ្នាំ ២០២០ កន្លងទៅ ចំពេលដែលទីផ្សារការងារធ្លាក់ចុះដែលរងការវាយប្រហារដោយជំងឺរាតត្បាតកូវីដ-១៩។
ចំនួនបុគ្គលិកដែលបានចុះឈ្មោះនៅក្នុងប្រទេសកូរ៉េខាងត្បូងដែលមានសិទ្ធិទទួលបានកម្មវិធីធានារ៉ាប់រងរបស់រដ្ឋបានកើនឡើងដល់ ២៤.៨៣លាននាក់ ក្នុងឆ្នាំ ២០២០ កើនឡើង ១.៩% ធៀបនឹងឆ្នាំមុន នេះបើយោងតាមទិន្នន័យពីស្ថាប័នស្ថិតិកូរ៉េ។ ក្នុងចំណោមអ្នកទាំងនោះ មានចំនួនប្រមាណ ៣.៦៧លាននាក់ បានផ្លាស់ប្តូរការងារក្នុងឆ្នាំ២០២០ ដែលស្មើនឹង១៤.៨% នៃចំនួនអ្នកបំពេញការងារសរុប។
យ៉ាងណាមិញ តួលេខនេះបង្ហាញថា អត្រាអ្នកផ្លាស់ប្តូរការងារឆ្នាំ ២០២០ បានធ្លាក់ចុះពី តួលេខចំនួន ១៥.៩% ដែលបានកត់ត្រាសម្រាប់ឆ្នាំ២០១៩។ ក្នុងចំណោមមនុស្សដែលផ្លាស់ប្តូរការងារ មនុស្សដែលមានអាយុចន្លោះពី១៥ ដល់២៩ឆ្នាំមានចំនួន ២០.៥% ខណៈដែលអ្នកដែលមានអាយុ ៤០ឆ្នាំ មានចំនួន១៣%។
ក្នុងចំណោមនិយោជិតដែលបានចុះឈ្មោះសរុប មានមនុស្សចំនួន ១៧.២លាននាក់បានបន្តធ្វើការងារដដែលក្នុងឆ្នាំ២០២០។ ក្នុងនោះដែរ ទិន្នន័យបានបង្ហាញថា ៥៩.២% នៃអ្នកដែលបានផ្លាស់ប្តូរការងារបានឃើញប្រាក់ឈ្នួលរបស់ពួកគេកើនឡើងនៅឆ្នាំ២០២០។
ប្រទេសកូរ៉េខាងត្បូងបានកាត់បន្ថយចំនួនការងារច្រើនបំផុតក្នុងរយៈពេល ២២ ឆ្នាំចុងក្រោយ កាលពីឆ្នាំ ២០២០ កន្លងទៅដោយសារតែស្ថានការណ៍ប៉ះពាល់ពីជំងឺរាតត្បាតសកល។ ចំនួនអ្នកមានការងារធ្វើធ្លាក់ចុះមកនៅត្រឹម ២៦.៩លាននាក់ក្នុងឆ្នាំ២០២០ ដោយបានធ្លាក់ចុះ ២១៨ ០០០ នាក់ ធៀបនឹងឆ្នាំមុន។ អត្រាគ្មានការងារធ្វើបានឈានដល់ ៤% ក្នុងឆ្នាំ២០២០ កើនឡើងពី ៣.៨% ក្នុងឆ្នាំ២០១៩។
