កូរ៉េខាងត្បូង៖ ឆ្នាំក្រោយ២០២២នេះ កូរ៉េខាងត្បូងអាចនឹងទទួលយកកូតាពលករបរទេសកាន់វីសា (E-9) ដល់ទៅចំនួន ៦៦,០០០នាក់ នេះបើតាមការពិភាក្សាក្រសួងការងារ និងពលកម្មកូរ៉េ ដែលត្រូវបានដកស្រង់ពីសារព័ត៌មាន និងចែករំលែកដោយទំព័រហ្វេសប៊ុក Meng Costa Page បំណងល្អពីខ្ញុំ។
តាមរយៈការចែករំលែកនេះបានឱ្យដឹងថាតាមការរពិភាក្សាក្រសួងការងារកូរ៉េ និងផ្សព្វផ្សាយតាមសារព័ត៌មាននៅថ្ងៃទី១៦ ខែធ្នូនេះ បានអោយដឹងថា ឆ្នាំក្រោយ ២០២២ កូរ៉េខាងត្បូងនឹងទទួលយកកូតាពលករបរទេសដែលកាន់ទិដ្ឋាការ វីសារ (E-9) ចំនួន ៦៦,០០០ នាក់ ក្រោមប្រព័ន្ធអនុញ្ញាតការងារ (EPS) នៅឆ្នាំក្រោយ។ លទ្ធផលនេះយោងតាមការប្រជុំដោយក្រុមការងារគោលនយោបាយកម្លាំងពលកម្មបរទេសកាលពីថ្ងៃទី១០ ខែធ្នូ ២០២១ កន្លងមក។
សំណើនេះនឹងត្រូវសម្រេចបញ្ចប់ក្នុងពេលឆាប់ៗនេះ ដោយគណៈកម្មាធិការគោលនយោបាយកម្លាំងពលកម្មបរទេស ដែលដឹកនាំដោយប្រធានការិយាល័យសម្របសម្រួលគោលនយោបាយរដ្ឋាភិបាល។
ប្រសិនបេីឆ្នាំក្រោយសម្រេចយកកូតាពលករចំនួន ៦៦,០០០នាក់មែននោះ គឺច្រេីនជាងឆ្នាំនេះដល់ទៅ ១៤,០០០នាក់ ហើយអស់រយ:ពេល៩ឆ្នាំមកហេីយ ដែលកូរ៉េខាងត្បូងកំណត់កូតាយកពលករបរទេសច្រេីនបែបនេះ ចាប់តាំងពីឆ្នាំ២០១៣មក ដែលកាលនោះ កូតាយក ៦២,០០០នាក់។
សូមបញ្ជាក់ថា កូតា ៦៦,០០០០នាក់ បែងចែកជាប្រភេទ៥ធំៗ៖ វិស័យឧស្សាហកម្ម ៤៣,០០០នាក់ វិស័យកសិកម្ម ៩,៩៣០នាក់ វិស័យនេសាទ ៤,៦៤០នាក់ វិស័យសំណង់ ៣,៩៧០នាក់ វិស័យសេវាកម្ម ២៦០នាក់។ ដូចនេះ សូមបងប្អូនទាំងអស់រង់ចាំមេីលព័ត៌មានផ្លូវការពីខាងក្រសួងការងារ និងពលកម្មកូរ៉េខាងត្បូង ដែលអាចនឹងចេញផ្សព្វផ្សាយឆាប់ៗនេះ។
