កូរ៉េខាងត្បូង៖ ក្នុងខណៈដែលប្រទេសកូរ៉េខាងត្បូងកំពុងអបអរសាទរពិធីបុណ្យប្រពៃណីឈូសុកពីថ្ងៃទី២០ ដល់ថ្ងៃ២២ កញ្ញានេះ សម្រាប់លោកជំទាវឯកអគ្គរាជទូតកម្ពុជា ដែលទើបនឹងចាប់ផ្តើមបេសកកម្មការទូតថ្មីនៅលើទឹកដីកូរ៉េខាងត្បូងវិញ គឺមិនបានទុកពេលទំនេរនៃថ្ងៃឈប់សម្រាកនេះចោលនោះទេ គឺលោកជំទាវនិងក្រុមការងារបានធ្វើដំណើរទៅតាមខេត្តក្រុងនានាដែលមានបងប្អូនខ្មែរយើងនៅច្រើន ដើម្បីសួរសុខទុក្ខ និងពិនិត្យស្ថានភាពការរស់នៅ ការងារ និងការរកស៊ីរបស់បងប្អូនខ្មែរយើងយ៉ាងយកចិត្តទុកដាក់។
ចែករំលែកបង្ហោះក្នុងទំព័រហ្វេសប៊ុករបស់លោកជំទាវបានឱ្យដឹងថា កាលពីថ្ងៃចុងសប្តាហ៍ លោកជំទាវនិងក្រុមការងារបានធ្វេីដំណេីរទៅទីក្រុងអានសានដេីម្បីស្វែងយល់ពីការរស់នៅរបស់បងប្អូនខ្មែរ ក៏ដូចជាចង់ស្វែងយល់ពីផលិតខ្មែរនៅលេីទីផ្សារកូរ៉េ និងសិក្សាពីតំរូវការផលិតផលនៅលេីទីផ្សារបច្ចុប្បន្ន ដេីម្បីជម្រុញការនាំចូលផលិតផលខ្មែរមកកាន់ទីផ្សារនេះ។
ចំណែកឯក្នុងថ្ងៃចន្ទម្សិលមិញនេះដែលជាបុណ្យឈូសុកឱកាសថ្ងៃឈប់សំរាកនៅកូរ៉េខាងត្បូង លោកជំទាវក៏បានបានមកលេងដល់តំបន់អ៉ឺយចងប៊ូ ហេីយក៏បានចូលជួបសំណេះសំណាលជាមួយបងស្រីម្ចាស់ហាងម្ហូបខ្មែរ អប្សរាអង្គរ។
ជាមួយគ្នានេះដែរ លោកជំទាវបានបញ្ជាក់ថាពិតជាសប្បាយរីករាយដែលបានជួប និងឃេីញបងប្អូនខ្មែរជាច្រេីនបានអញ្ជេីញមកទទួលទានអាហារ និងជួយគាំទ្រមុខម្ហូបខ្មែរក្នុងហាងរបស់បងស្រី នាពេលឈប់សំរាកនេះ។ លោកជំទាវក៏បានជូនពរអោយបងប្អូនខ្មែរនៅប្រទេសកូរ៉េទាំងអស់ធ្វេីដំណេីរមានសុវត្ថិភាព ក្នុងរដូវកាលឈប់សំរាកនេះ។
មិនទាន់បញ្ចប់នោះទេ មកដល់តំបន់អ៉ឺយចងប៊ូនេះ លោកជំទាវបានរៀបរាប់ថាបានជួបបងប្អូនខ្មែរយើងដែលគាត់ដើរកំសាន្តនារដូវកាលឈប់សំរាកនេះជាច្រើន និងពិតជារីករាយណាស់ដែលបានទទួលការស្វាគមន៍យ៉ាងកក់ក្ដៅពីពួកគាត់ ហើយក៏បានធ្វើការពិភាក្សា និងស្វែងយល់ពីទិដ្ឋភាពនៃការរស់នៅរបស់គាត់នៅលើទឹកដីកូរ៉េនេះ ហើយសង្ឃឹមថាខ្ញុំនិងមន្រ្តីស្ថានទូតទាំងអស់នឹងអាចបន្តជួយសម្រួលដល់ការរស់នៅរបស់ពួកគាត់អោយកាន់តែប្រសើរឡើង។
ក្នុងនោះដែរ ក្រោយពីបានធ្វើដំណើរទៅដល់អ៉ឺយចងប៊ូ រយៈពេលមួយថ្ងៃពេញ លោកជំទាវបានបង្ហោះចែករំលែកថាថ្ងៃនេះមកដល់ផ្ទះយប់បន្តិចហើយ តែសប្បាយចិត្តដែលបានជួបបងប្អូនខ្មែរយើងនៅតាមតំបន់និមួយៗដោយសុទ្ធតែមិនបានមានការព្រាងទុកជាមុន ហើយលោកជំទាវបានលើកថែមទៀតថា «ចាំមើលថាតើស្អែកបានទៅតំបន់ណា ហើយបានជួបបងប្អូនណាខ្លះ»។
