មិនត្រឹមជាទូតខ្មែរដំបូងបង្អស់ ដែលអាចឆក់បេះដូងបងប្អូនខ្មែរនៅកូរ៉េបាន តែក៏ជាឪពុក បងប្រុស និងជាគ្រូ!! ពាក្យសម្តីប៉ុន្មានម៉ាត់នេះ លោកទូ​ត ឡុង ឌីម៉ង់ខ្លួនឯងអានហើយ ក៏រំភើបទប់ទឹកភ្នែកមិនជាប់ដែរ!!

កូរ៉េខាងត្បូង៖ ក្រោយពីឯកឧត្តម ឡុង ឌីម៉ង អតីតឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េ ទើបនឹងបញ្ចប់អាណត្តិជាផ្លូវការ និងបានធ្វើមាតុភូមិនិវត្តន៍វិញកាលពីថ្ងៃទី១០ កញ្ញា ២០២១ម្សិលមិញនេះ បងប្អូនខ្មែរយើងនៅកូរ៉េខាងត្បូងដែលគោរពស្រឡាញ់លោកទូតបានបញ្ចេញអារម្មណ៍ និងវាចាគោរពស្រលាញ់ចំពោះលោកទូតក្នុងបេសកកម្មការទូតនៅលើទឹកដីកូរ៉េខាងត្បូង។

ក្នុងចំណោមពាក្យសម្តីអនុស្សាវរីយ៍ល្អៗគួរឱ្យរំភើបដែលបងប្អូនខ្មែរយើងនៅកូរ៉េខាងត្បូង បានសរសេររៀបរាប់ជូនលោកទូត​ មានបងស្រីឈ្មោះថា Taeyeon Lee បានលើកឡើងថាលោកទូត ឡុង​ ឌីម៉ង់ ជាម្លប់ដ៏ត្រជាក់ និងជា «ឯកអគ្គរាជទូតប្រចាំសាធារណកូរ៉េដំបូងគេបង្អស់ ដែលឆក់យកបេះដូងនិងក្តីស្រលាញ់ពីបងប្អូនខ្មែរនៅប្រទេសកូរ៉េ រយះពេល 5 ឆ្នាំបងប្អូនខ្មែររាប់មុឺននាក់ទទួលច្រកក្រោមម្លប់ដ៏ត្រជាមួយនេះ  សូមអរគុណបងៗដែលស្រលាញ់រាប់អានប្អូន» និងបានជូនពរ «សូមជូនពរបងៗជួបតែសេចក្ដីសុខ ជោគជយ័គ្រប់ភារកិច្ច»។

បងស្រី Sreng Vuchny ខ្មែរយើងនៅកូរ៉េម្នាក់ផ្សេងទៀតបានលើកឡើងថា «ពិតជាមានមោទនភាពខ្លាំងណាស់ដែលបានបម្រើការងារជាមួយមេតាំងពីមកដល់ទឹកដីកូរ៉េរហូតវិលត្រទ្បប់ទៅវិញ។ មេនិងបងស្រីរួមទាំងក្រុមការងារ មេនិងបងស្រីប្រៀបដូចជាឪពុកម្ដាយទីពីរ ជាមេ ជាគ្រូ ជាគ្រួសារ ជាមិត្តដែលតែងតែបង្រៀននែនាំបង្ហាញទិស ភាពរីកចម្រើនរបស់ខ្ញុំក៌មានចំនែកនៃការផ្ដល់ឪកាសការងារផ្សេងៗពីមេ។ ក្ដីសុខរបស់មេនិងបងស្រីក៌មានស្នាមញញឹមខ្ញុំនៃការគោរពស្រលាញ់ដ៌មានន័យ។»

បងប្រុសម្នាក់ទៀត ឈ្មោះ Lim Kola ក៏បានលើកឡើងថាពីដួងចិត្ត ដោយបានលើកឡើងថា លោកទូត ឡុង​ ឌីម៉ង់​ គឺ «លេីសពីឯកអគ្គរាជទូត​ លោកគឺ​ ៖ ជាថ្នាក់ដឹកនាំ​ លោកត្រូវបានតែងតាំងដោយរាជរដ្ឋាភិបាលកម្ពុជា​ ដេីម្បីមកតំណាងអោយព្រះរាជាណាចក្រកម្ពុជា​នៅក្នុងប្រទេសកូរ៉េ​ ហេីយបានកសាងស្នាដៃធំៗ និងសមិទ្ធិផលជាច្រើនរាប់មិនអស់ជូនដល់មាតុភូមិកម្ពុជាកន្លងមក។ ជាឪពុក​ លោកគឺជាអាណាព្យាបាលដ៏ល្អដែលពោពេញដោយមនោសញ្ចេតនាជ្រាលជ្រៅ​ និងបានមេីលថែ​ ស្រលាញ់ប្រជាពលរដ្ឋខ្មែរនៅកូរ៉េប្រៀបដូចជាកូន​ចៅក្នុងគ្រួសារដូច្នោះដែរ។ ជាបងប្រុស​ លោកបានមេីលថែការពារ​ គ្រប់រាល់​ ពលករ​ ពលការនី​ សិស្ស​ និស្សិត​ ស្រ្តីរៀបការ​ នឹងបងប្អូនខ្មែរដែលរស់នៅក្នុងប្រទេសកូរ៉េ​ ដោយមិនមានប្រកាន់សាសនា​ និងនិន្នាការនយោបាយណាមួយឡេីយ។ និងជាគ្រូ​ លោកបានបង្រៀន​ និងផ្ដល់ដំបូន្មានល្អៗជាច្រេីន​ បន្សល់ទុកសម្រាប់បងប្អូននៅកូរ៉េ​ ហេីយតែងតែណែនាំបងប្អូនខ្មែរអោយប្រព្រឹត្តអំពេីល្អ​ ខិតខំសន្សំប្រាក់កាស​ ក្នុងឱកាសបានរស់នៅប្រទេសកូរ៉េ​ អាចមានលទ្ធភាពនិងដេីមទុក​ ដេីម្បីកសាងជីវភាពដ៏ល្អសមរម្យ​និងមុខរបរផ្សេងៗនៅឯប្រទេសកម្ពុជាយេីង។»

បងប្រុសរូបនេះបានបន្តថា «សម្រាប់ខ្ញុំពិតជាមានអារម្មណ៍ក្តុកក្ដួលនាថ្ងៃចុងក្រោយដែលបានជូនដំណេីរបងប្រុសត្រលប់ទៅកាន់មាតុភូមិនិវត្តន៍វិញ​ ព្រោះកន្លងមករយៈពេល៥ឆ្នាំនេះ​ បងប្រុសនិងបងស្រី​ បានផ្ដល់នូវក្ដីមេត្តា​ ក្ដីស្រលាញ់​ និងមនោសញ្ចេតនាដ៏ជ្រាលជ្រៅបំផុត​ សម្រាប់ខ្ញុំ​ និង​ គ្រួសាររបស់ខ្ញុំ​ ប្រៀបដូចជាមនុស្សក្នុងគ្រួសាររបស់បងដែរ។ ទឹកភ្នែករមៀលចុះដោយមិនដឹងខ្លួន​ ដោយក្ដីគោរព​ និងស្រលាញ់បងប្រុស​ និងបងស្រី​ សម្រាប់ទំហំដែលមិនអាចរៀបរាប់បាន។»

ជាពាក្យឆ្លើយតប លោកទូត បានសរសេរថា «បងបានអានសាររបស់ប្អូនហើយ ក៏បងមិនអាចទប់ទឹកភ្នែករបស់បងបានដែរ…តែវាជាទឹកភ្នែកនៃក្តីស្រឡាញ់របស់បងចំពោះប្អូនប្រុស។ អូនគឺជាប្អូនប្រុសរបស់បង ជាសមាជិកមហាគ្រួសារយើងតែមួយ។ យើងនឹងជួបគ្នានាពេលឆាប់ៗមករួមការងារធ្វើជាមួយគ្នាទៀតដើម្បីជាតិនិងប្រជាជនយើង។ បងនឹកប្អូន »

បងស្រី Han JeongWon បានចែករំលែកលើហ្វេសប៊ុកខ្លួនដែរថា «ឯកឧត្ដម​ Long Dimanche​ គាត់​ជាវិរៈ​បុរស​មន្ត្រី​ការទូត​ដ៏​ឆ្នើម​ម្នាក់​ប្រចាំ​ដួងចិត្តបងប្អូនខ្មែរយើងនៅក្នុង​សាធារណៈ​រដ្ឋ​កូរ៉េ​។ ថ្ងៃនេះ​គាត់​បានធ្វេី​​សមាហរណកម្ម​ត្រឡប់​ទៅ​មាតុភូមិ​វិញ​ហេីយ​។ រយ:ពេល៥ឆ្នាំកន្លងមកគាត់​បាន​បំពេញ​បេសកកម្ម​​យ៉ាង​ល្អនិងសកម្ម​បំផុត​ ទោះបីជានឿយហត់យ៉ាងណាក៏គាត់​មិនដែលរុញរាក្នុងការបំពេញតួរនាទីម្ដងណាឡើយ រួមទាំងក្រុម​ការងារ​មន្រ្តីស្ថាន​ទូត​ទាំង​អស់​ផងដែរ។ ឯកឧត្ដម​ Long Dimanche​ គឺជាមន្ត្រី​ការទូត​ម្នាក់​ដ៏​ឆ្នេីម​បំផុត​​ ហេីយគួរឲ្យគោរព គួរឲ្យកោតសរសើរខ្លាំងបំផុត ហើយគាត់​ជាមន្ត្រី​ការទូតម្នាក់ដែល​មាន​សមត្ថភាព​ គឺគាត់តែងតែជួយ​សម្រួល​ការងារ​តូចធំ​គ្រប់រាល់ការងារទាំងអស់នៅក្នុង​ប្រទេស​កូរ៉េ​។ នាង​ខ្ញុំ​ក៏​សូម​ថ្លែងអំណរអរគុណ​ចំពោះ​ទឹកចិត្ត​បងប្រុស​កន្លង​មក ដែលបងប្រុសតែងតែ​ជួយពន្យល់​ណែនាំ​និង​ដាស់តឿនស្មារតី​និងការជំរុញលើកទឹកចិត្ត នៅរាល់ដំបូន្នានយ៉ាងកក់ក្តៅផងដែរ។ នាងខ្ញុំ​សូម​ប្រសិទ្ធ​ពរជ័យ​ សិរីមសិរីមង្គល​ វិបុល​​សុខ​ មហា​ប្រសេីរ​ជូន​ចំពោះ​បងឯក​ឧត្ដម​ព្រមទាំង​គ្រួសារ​បងប្រុស​ទាំង​អស់ សូម​ឲ្យមានសុខភាព​ល្អ​បរិបូរណ៍​ មានកម្លាំង​ខ្លាំងក្លា​ ប្រាជ្ញា​ឈ្លាសវៃ​ ដេីម្បី​រួម​ចំណែក​ក្នុង​អភិវឌ្ឍ​មាតុភូមិ​កម្ពុជាយើងឲ្យកាន់​តែ​រីកចម្រើន​ជឿនលឿន​ទៅមុខជា​និរន្តរ៍​។ »

ចំណែកបងប្រុសអតីតទីប្រឹក្សាការងារនៅកូរ៉េខាងត្បូង ក៏បានសរសររៀបរាប់ថា ក្រោមការដឹកនាំរបស់លោកទូត ឡុង ឌីម៉ង់ គឺមានបទពិសោធន៍អស្ចារ្យល្អៗ ហើយលោកទូតតែងតែចែករំលែកការណែនាំ ដំបូន្មានល្អៗ ជម្រុញទឹកចិត្ត និងឱ្យតម្លៃចំពោះការខិតខំប្រឹងប្រែងរបស់ក្រុមការងារទាំងអស់ និងរាប់អានគ្រប់ៗគ្នាដូចទៅនឹងក្រុមគ្រួសាររបស់លោកផងដែរ។ បងប្រុសអតីតទីប្រឹក្សាការងារ បានបញ្ជាក់ផងដែរថា បើទោះបីជាអាណត្តិបេសកកម្មរបស់លោកទូតបិទបញ្ចប់ក៏ពិតមែន តែកេរ្តិ៍ឈ្មោះសុសសាយនៅលើទឹកដីកូរ៉េ នឹងនៅតែបន្តដក់ក្នុងក្រអៅបេះដូងរបស់បងប្អូនខ្មែរយើងនៅកូរ៉េគ្រប់ៗរូប។

សូមបញ្ជាក់ថា ក្រោយពីឯកឧត្តមទូត ឡុង ឌីម៉ង់បានធ្វើមាតុភូមិនិវត្តន៍ពីប្រទេសកូរ៉េខាងត្បូងហើយនោះ លោកជំទាវទូតថ្មី ជ្រឹង បុទុមរង្សី ថ្ងៃសៅរ៍នេះក៏បានអញ្ជើញមកដល់ទឹកដីកូរ៉េខាងត្បូង ដើម្បីចាប់ផ្តើមទំព័រថ្មីនៃបេសកកម្មការទូតនៅទីនេះផងដែរ។

Leave a Reply

Your email address will not be published. Required fields are marked *