មានលុយ យកទៅសន្សំទុកចោលរាប់ឆ្នាំ ដូចទៅនឹងដុតលុយចោល? គិតគូរទាំងអស់គ្នា! កត្តាធំ ១ នេះហើយ នាំឱ្យការសន្សំលុយ ធ្វើឱ្យយើងខាតលុយទៅវិញ

របៀបសន្សំលុយរបស់​មនុស្សម្នាក់ៗគឺ​មាន​ភាពខុសៗពីគ្នា។ អ្នកខ្លះដាក់កូនជ្រូក អ្នកខ្លះទុកនៅផ្ទះ អ្នកខ្លះទុកក្នុងធនាគារ និងខ្លះទៀតទុកនៅម្តាយ (ឬអូន)។ យើងសន្សំព្រោះគិតថា វាគឺជារឿងត្រឹមត្រូវ។ តែយើងភ្លេចអំពីជ្រុងមួយនៃលុយសន្សំ គឺធាតុពិតយើងកំពុងខ្ជះខ្ជាយលុយទាំងនោះ។ ដល់​ត្រង់ចំណុច​នេះអ្នក​អាច​ពិបាក​យល់​បន្តិចហើយ ដើម្បី​បកស្រាយ​ឲ្យ​ច្បាស់​ សូមទៅអាន​អត្ថន័យ​ខាង​ក្រោម​ តែចង់បញ្ជាក់​បន្តិច​សិន​ថា​ ក្នុងអត្ថបទនេះ យើងសូមមិននិយាយពីលុយសន្សំសម្រាប់គ្រាអាសន្នទេ ពីព្រោះទោះជាយ៉ាងណា ឬក្នុងកាលៈទេសៈណា អ្នកត្រូវតែមានវា។ តែយើងមកនិយាយពីលុយសន្សំ ឬការទុកដាក់លុយធម្មតាវិញ។

អ្វីដែលយើងត្រូវដឹងគឺ ដោយសារមក​ពីបញ្ហាកត្តាផ្សេងៗដែលអ្នកគ្រប់គ្រងមិនបាន ដូច្នេះហើយលុយដែលអ្នកសន្សំ ធ្លាក់ថ្លៃបន្តិចម្តងៗ។ លុយ ១០០០ ដុល្លារ ដែលអ្នកសន្សំក្នុងកូនជ្រូកថ្ងៃនេះ អាចនឹងមានតម្លៃតិចជាងនេះ នៅពេលប៉ុន្មានឆ្នាំខាងមុខ។ ដើម្បីឲ្យងាយយល់ យើងមកមើលឧទាហរណ៍មួយ នៅប្រទេសហ្វីលីពីន៖
នៅឆ្នាំ ២០០៤ តម្លៃអង្ករមួយគីឡូ នៅទីប្រជុំជនទីក្រុងម៉ានីឡា គឺ ១៨. ៦៣ ប៉េសូ (ប្រមាណ ១៥០០ រៀល) ដែលមានន័យថា បើអ្នកមានលុយ ១០, ០០០ ប៉េសូ (ប្រមាណ ៨០៧​ ០០០ រៀល) អ្នកអាចទិញអង្ករបាន រហូតដល់ជាង ៥០០ គីឡូឯណោះ។

១០ឆ្នាំក្រោយមក គឺនៅឆ្នាំ២០១៤ តម្លៃអង្ករនៅទីប្រជុំជនទីក្រុងម៉ានីឡាគឺ ៣៦ ប៉េសូ (ប្រមាណ ២៩០០ រៀល)។ ឧបមារថា បើអ្នកដាក់លុយ ១០, ០០០ ប៉េសូ របស់អ្នកក្នុងគណនីសន្សំរបស់ធនាគារ ជាមួយការប្រាក់ ៥% ក្នុងមួយឆ្នាំ កាលពីឆ្នាំ ២០០៤ តើមកដល់ឆ្នាំ ២០១៤ អ្នកទិញអង្ករបានប៉ុន្មានគីឡូ?

ជាមួយនឹងការប្រាក់ ៥% ក្នុងមួយឆ្នាំ ពេលអ្នកដកលុយមកវិញនៅក្នុងឆ្នាំ ២០១៤ អ្នកនឹងបានលុយប្រហែល ១៥ ០០០ ប៉េសូ តែលុយនោះអ្នកយក​ទៅទិញអង្ករបានតែជាង ៤០០ គីឡូប៉ុណ្ណោះ ព្រោះតម្លៃអង្ករឥឡូវវាឡើងថ្លៃហើយ។ បើគិតជាអង្ករគឺអ្នកខាតជិតមួយរយគីឡូ។ តែនេះមិនមែនមានន័យថា ការដាក់ប្រាក់ក្នុងគណនីធនាគារអត់ប្រយោជន៍នោះទេ។ វាល្អសម្រាប់ទុកដាក់លុយដូចជាលុយសន្សំពេលមានអាសន្នជាដើម។

ក៏ប៉ុន្តែ បើអ្នកចង់សន្សំលុយ​ឬ​ទុកលុយ ដោយមិនខាត សូមអ្នកវិនិយោគលុយភាគច្រើន ទៅលើអ្វីដែលផ្តល់ប្រាក់ចំណេញខ្ពស់ជាងអតិផរណា។ ការវិនិយោគមានច្រើនបែប ច្រើនយ៉ាង ដូចជាការវិនិយោគលើភាគហ៊ុន cryptocurrency អចលនទ្រព្យ ការចូលហ៊ុនរកស៊ីជាដើម។ ការសម្រេចចិត្តថាវិនិយោគលើអ្វី វាអាស្រ័យលើស្ថានភាពអ្នកផ្ទាល់។

ខ្លឹមសារទាំងស្រុងពី៖ ទំព័រហ្វេសប៊ុក​ CamboFinance!! ដោយឡែក​ សម្រាប់​អ្នក​ដែល​ចាប់​អារម្មណ៍​លើ​រឿង​វិនិយោគ អ្នក​អាច​ស្វែង​យល់​ចំណេះដឹងខ្លះៗ​ តាមរយៈអត្ថបទ​ផ្សេងៗ​របស់យើងដែល​បាន​បង្ហោះ​ក្នុង​ទំព័រ​ហ្វេសប៊ុក​ផេក​របស់​ CamboFinance៕

Leave a Reply

Your email address will not be published.