ចុះបើយើងសុទ្ធតែចង់បានលុយចឹង ហេតុអ្វីធនាគារជាតិ មិនបោះពុម្ពប្រាក់អោយច្រើន ហើយចែកអោយប្រជាជនយើងចាយទៅ?

កាលពីក្មេង ខ្ញុំធ្លាប់សួរខ្លួនឯងថា “ប្រសិនបើប្រទេសយើងក្រអញ្ចឹង ហេតុអ្វីធនាគារជាតិ មិនបោះពុម្ពប្រាក់អោយច្រើន ហើយចែកអោយប្រជាជនយើងចាយទៅ?”

ប្រសិនបើអ្នកនៅតែមានចម្ងល់ន អ្នកមានប្រហែលជាមានសំណាងហើយ ព្រោះ CamboFinance នឹងស្រាយបំភ្លឺថា ការធ្វើបែបនេះអាចជារឿងឆ្កួតបំផុត ?។

១. វានឹងធ្វើអោយទំនិញទាំងអស់ឡើងថ្លៃ

ប្រសិនបើមនុស្សគ្រប់រូបមានលុយច្រើនជាងមុន វាក៏នឹងធ្វើអោយទំនិញឡើងថ្លៃផងដែរ ព្រោះមនុស្សទាមទារប្រាក់ខែច្រើនជាងមុន អ្នកដាំដំណាំ ចិញ្ចឹមសត្វ លក់ផលិតផលច្រើនជាងមុន …។ ហើយនៅទីបញ្ចប់ អ្នកក៏ត្រូវការប្រាក់ច្រើនជាងមុនផងដែរ ដើម្បីរស់នៅ។ យើងអាចក្រឡេកទៅមើលប្រទេស ហ្ស៊ីមបាវេ ជាឧទាហរណ៍ស្រាប់ ដោយប្រទេសនេះបានបោះពុម្ពក្រដាសប្រាក់ជាច្រើន ហើយជាលទ្ធផលវាធ្វើអោយ អតិផរណាឡើងដល់ 231,000,000% ឯណោះក្នុងឆ្នាំ ២០០៨។ នេះមានន័យថាកាតទូរស័ព្ទ ធ្លាប់មានតម្លៃ 1ដុល្លារ តែវាបានឡើងថ្លៃខ្លាំងដល់តម្លៃ 231 លាន ដុល្លារឯណោះ ក្នុងពេលមិនដល់មួយឆ្នាំផង។

២. ធ្វើអោយបាត់បង់តម្លៃរូបិយប័ណ្ណក្នុងស្រុក

ប្រាក់រៀលយើងមានស្ថេរភាពល្អបំផុត ព្រោះអស់រយៈពេលជាច្រើនឆ្នាំមកនេះ អត្រាប្តូរប្រាក់យើងនៅតែរក្សាបាន ១ ដុល្លារ ប្រហាក់ប្រហែល ៤ ពាន់រៀល។ ប្រសិនបើធនាគារជាតិហ៊ានបោះពុម្ពលុយយ៉ាងច្រើនសន្ធឹកសន្ធាប់បន្ថែម វានឹងធ្វើអោយតម្លៃលុយរៀល ចុះថោក ពោលអាច ១ ដុល្លារ ដូរចាយបាន ៥ពាន់ ឬ ៦ ពាន់រៀលឯនោះ។ រឿងនេះបានកើតឡើងរួចហើយ នៅប្រទេស វ៉េណេស៊ុយអេឡា ពោលសូម្បីតែប្រជាជនខ្លួនឯង ក៏លែងចង់ចាយដែរ ព្រោះអីវាចុះថោកខ្លាំងពេក។

សរុបរួមមក ការបោះពុម្ពលុយ គឺមានពេល និង កាលៈទេសៈរបស់វា ហើយកិច្ចការងារទាំងអស់នេះ គឺត្រូវរ៉ាប់រងដោយធនាគារជាតិទាំងស្រុង។